Saudi Arabia PM thar atan Crown Prince Mohammed bin Salman ruat

Saudi Arabia Crown Prince Mohammed bin Salman chu an lalrama prime minister thar atan King Salman chuan a ruat tih Saudi Press Agency official chuan Thawhlehni khan a sawi.

Prince Mohammed hi khawvel ram zinga oil thawn chhuak tam ber, Saudi Arabia rama thuneitu sang ni mekin, PM thar atana ruat a nihna hian an sorkara a thuneihna chu a rawn nemnghet a ni.

Crown prince, MBS tiha hriat hian deputy prime minister bakah defence minister hna a chelh ṭhin a ni. PM atana ruat a nih hnuah defence minister chu a nau, Khalid bin Salman-a'n a chelh ang.

Lal thupek chuan senior minister dang zawngte chu an hna ngai an chelh chhunzawm dawn tih a sawi bawk.

PM dinhmun hi kum 86 mi, King Salman hian a chelh ṭhin a ni. PM atana kum 37 mi, Crown Prince ruat a nih chhan hi sawichian a ni lo a, mahse King hian cabinet meeting pawh a la kaih­hruai chhunzawm zel dawn nia sawi a ni. King Salman hi May thla khan damdawi-inah awmin hun eng emaw chen enkawl a lo ni tawh a ni.

PM atana ruat a nih hma pawh­in crown prince hian portfo­lio pawimawh - defence bakah economy, oil leh internal security lamte a lo enkawl tawh a ni.