NKorea-in US bomber kahthlak sakah vau

North Korea chuan an international airspace-a US bomber thlawh tir chu kahthlak sakah a vau a, US President Donald Trump chu an ram laka indo puangah a puh bawk.

North Korea foreign minister Ri Yong-ho chuan, “US hian kan ram lakah indo a puang hmasa tih hi khawvelin a hriatchian a ngai a ni”, a ti. Hei hi US President Trump-a’n Pathianni-a a twitter-a NKorea ram hruaitute chu an awm zui rei dawn lo tia a ziah chungchang a sawina a ni.

Kar kalta Thawhlehni khan President Trump hian a ṭum khatna atana UN General Assembly-a thu a sawiah, North Korea-in US leh a thawhpui ramte a bei a nih chuan NKorea ram chu tihchhiat vekah alo vau tawh bawk.

Ri chuan UN leh ram dangte chuan US leh NKorea te ṭawngkama an invauna ṭhin chu a taka chantir a nih loh an duh tih a sawi a, mahse Trump-a’n NKorea hotu chu a awm rei tawh lo ang tia a sawi leh chuan an ram laka indo a puang ta nia an ngaih thu a sawi. US President dinhmun chelh mek hnen aṭanga hetiang ṭawngkam chhuak chu chiang taka indo a puanna a ni, a ti.

US-in an ram laka indo a puan tak avangin NKorea chuan lo bei let turin dikna a nei tih Ri chuan a sawi a, US bomber-te pawh kapthla turin dikna an nei tih a sawi bawk. Tunge awm zui rei lo zawk dawn tih chu chhanin a awm mai dawn a ni, a ti.

Hetih lai hian US chuan NKorea laka indo puang nia puhna chu a pha thung a, mahse NKorea hian a nawr lui zel a nih chuan sipai chakna hman a ngaih hun ala awm thei dawn niin a sawi. Pentagon thupuangtu, Sarah Huckabee Sanders chuan NKorea lakah indo an puang lo tih sawiin, Korea Peninsula-a boruak muanawm a awm chu an dub ber a nih thu a sawi. Hemi rual hian international airspace-a ramdang aircraft thlawk lo kahthlak chu pawmzam theih a ni dawn lo tih a sawi bawk.