Saudi Arabia-in hmeichhe motor khalh phalsak dawn

Saudia Arabia lal, King Salman chuan hmeichhiate motor khalh phalsakna tur thupek a tichhuak a, thupek hi June 24, 2018 aṭangin hman ṭan a ni ang.

Saudi Arabia hi khawvela hmeichhe motor khalh khaptu ram awmchhun a ni. Mipa chauh driving licence pek an ni a, hmeichhia motor khalhte chu man leh pawisa chawitir ṭhin an ni.

Saudi hmeichhiate motor khalh phalsak an ni ta hi activist leh ram hrang hrang pawhin lawmawm an tih thu an sawi a, US President Donald Trump chuan hmeichhia­te dikna chanvo humhalh sakna kawngah hmasawnna ropui tak a nih thu a sawi. Saudi Arabia sorkar hian kar kalta Inrinni khan hmeichhiate chu a ṭum khatna atan sports stadium-a an luh alo phalsak tawh bawk a ni.

King Salman-a’n hmeichhe motor khalh phalsakna tur thupek a siam chung­chang bawhzui tur hian ministerial body din a ni dawn a, an ni hian ni 30 chhungin rawtna an neihte an thehlut ang. He thupek hi nakkum June 24 aṭanga hman ṭan tur a ni a, hemi rual hian Sharia duhdan anga kalpui a ni ang. Hmeichhe motor khalh phalsak hi sakhaw lama thuneitu sang, Council of Senior Religous Scholars pawhin a remti a ni.

US-a Saudia ambassador, Prince Khaled bin Salman chuan hmeichhiaten motor khalh zir turin mipa phalna an lak kher a ngai tawh dawn lo tih a sawi. Amnesty International hotu Philip Luther chuan hmasawnna kawng khat a nih thu sawiin, Saudi Arabia-a inthliarhranna dan hrang hrang awmte pawh tihbo a nih chhoh zel an beisei thu a sawi a ni.