Greece-ah swine flu hri leng vangin emergency puang

Greece Ministry of Rural Development and Food chuan African swine flu chu an ramah hmuh a nih thu a tihchian hnuah, Ningani khan ram pumah emergency puan nghal a ni tih a tarlang. 

Feburary 4 khan Greece hmarchhak lama awm Serres khaw bula farm-ah swine flu hi hmuhchhuah a nih thu Athens Veterinary Center chuan a tichiang tawh a ni. Hemi hnu hian venthawn thilah rampumah emergency hi sorkar chuan a puang zui ta a ni.

Swine flu hmuhna, farm-a vawk 31-te chu tihlumin phum zui nghal an ni. He hri leng hmuh chhuahna hmun aṭanga km 10 bial chhung leh Central Macedonia Region huam chhunga farm-a ran vulhte ni 40 chhung atan hmun danga laksawn phal a ni loh tih Minister of Rural Development and Food (MRDF) chuan thuchhuah an siam.

Hri leng mek hi a darh zual zel lohna turin sorkar chuan theihtawpa hma a lak mek thu Agricultural Development & Foods Minister Makis Voridis chuan a sawi. Engtin nge Greece-ah hian he hri leng hi a awm theih tih chiang takin la hre chhuak lo mah se, an ram ṭhenawm Bulgaria aṭanga vawk chi khat an lakluhna aṭanga kai a nih an rin thu Central Macedonia Region vice governor Sotiris Batos chuan a sawi.

Thla hlui khan Bulgaria-ah hian swine flu hri  kai an awm tih an ransa vulhah hmuh chhuah a lo ni tawh a ni.