Myanmar court-in kum 3 tang turin Suu Kyi leh a adviser hrem

Myanmar court chuan nimin khan an ram hruaitu aṭanga paihthlak tak, Aung San Suu Kyi leh Australian economist Sean Turnell-te chu official secrets act bawhchhiaa puhna thubuaia thiam loh chantirin, kum thum ve ve tang turin a hrem.

He thubuaiah vek hian Suu Kyi-i cabinet member pathum - Soe Win, Kyaw Win, leh Set Aung-te chu thiam loh chantir an ni bawk a, kum thum ṭheuh tang tura hrem an ni bawk.

Sydney, Australia-a Mac­quarie University-a associate professor in economics, Turnell hi Suu Kyi adviser-ah a ṭang ṭhin a, nikum February 1-a sipaiten civil sorkar thuneihna an hnehchhuh hnu lawkah an khawpui Naypyitaw-ah an man a ni. Myanmar chhuahsan a tum laiin, Yangon-a hotel pakhata airport-a hruaitu tur car a nghah laiin security force-ten an man a, thla 20 dawn tan-inah khung a ni tawh a ni.

Sipaite'n Myanmar civil sorkar thuneihna an hneh­chhuh tukah khan Turnell hian a twitter-ah amah chu a him thu leh, Myanmar mipuite chunga thil thleng erawhin a rilru a tihnat thu a ziak a ni.

Suu Kyi, Turnell leh cabinet minister hlui pathumte chu an kuta document an mansak behchhanin sipaite hian thubuai an siamsak a, an thil tihsual nia an sawi tak erawh puanzar a ni lo. Mahse nikum khan state TV chuan Turnell hian financial information thurukte neiin, ram pawnah tlanchhiat a tum niin a puang. Mahse Suu Kyi leh Turnell chuan an puhnate hi thu dik lo a nih thu an sawi thung.

Turnell hi immigration law bawhchhiaa puh a ni bawk a, he thubuaiah hian eng ang hremna nge pek a nih erawh hriatchian a la ni lo.

Myanmar sipai sorkarin thubuai a siamsak hi Naypyitaw tan-in courtroom siamah ngaihtuah a ni ṭhin a, thubuai ngaihtuah lai hian media leh mipuite an tel phalsak an ni lo. Defence lawyer-te pawh court rorel dan chu an puanzar khapsak an ni bawk.

Suu Kyi-i hi hruaitu a nihna aṭanga paihthlak a nih hnuah sipaite hian an hreng zui a, thubuai pawh eng emaw zat siamsak a ni tawh. Ram pawn aṭanga dan loa walkie-talkie lakluh leh kawl, hri leng vanga khuahkhirhna siam palzut,sorkar laka hel, inthlanpuia dik lo taka thilti leh eiruk thubuaiahte thiam lo chantir ni tawhin, heng thubuaiah hian kum 20 tang tura hremna siamsak a lo ni tawh bawk.

Hetih lai hian anti-corrup­tion law hnuaiah thubuai pasarih a nei mek bawk a, heng thubuaiahte hian thiam loh chantir a nih chuan thubuai pakhatah kum 15 thleng lung-in tantir leh sum chawitir theih a ni ang.