Sri Lanka-in sorkar hnathawkte tan Social media khuahkhirhna siam

Sri Lanka chuan zirlai naupangin ei tur ṭha an dawn loh avanga luhaia tlu nia official ṭhenkhatin an sawi thlalakte social media lamah a darh hnuah, sorkar hnathawkte tan social media khuahkhirhna a siam.

Nilaini khan sorkar chuan sorkar hnathawk mi maktaduai 1.5-te chu social media post lamah an ngaihdante sawi a khapsak. Hemi hma hian sorkar hnathawkte hi reporter-te an kawm khapsak an lo ni tawh bawk.

Sorkar thuchhuah chuan, "Sorkar officer-ten social media lama an ngaihdan an lo puang anih chuan an lakah hremna lekkawh theih a ni ang," a ti.

Province health official leh zirtirtuten zirlai eng emaw zat chu ei tur an dawn ṭhat loh avangin an chau a, luhaiin an tlu nia an sawi hnuah sorkar chuan he thupek hi a tichhuak a ni.

Sri Lanka hian economy lama an tlakchhiat ber ṭum an tawh avangin, kum 2021 kumtawp lam aṭang khan an ram mi maktaduai 22 chuangte chuan harsatna nasa tak an tawk. Ei leh in lam indaih lohna an tawh bakah, thil man a sang chak hle.