Japan PM-in Parliament ṭhiat

Japan Prime Minister Shinzo Abe chuan inthlan hun hma kum khatah inthlan buatsaih a nih theih nan Parliament Lower House, House of Representative chu nimin khan a ṭhiat. Inthlanpui hi October 22-ah neih a ni ang.

PM Abe hi tunhnaiah a larna a tlahniam nasa hle a, a hun hmaa inthlanpui buatsaih a tum avang hian eptu lam chuan nasa takin an bei a, a hmingchhiat chungchanga beih a tawh zel tur pumpelh a tumna niin an puh. Mipui ngaihdan lak hnuhnung berah PM atana Abe duhtu hi 50% aṭangin 30% ah a tlahniam tawh a ni.

Abe chuan an ramin harsatna a tawh mek - security leh mihring pung chak lo lutuk chungchanga hmalak dan thar ngaihtuah a nih theih nan inthlan neih hma hi a ngai niin a sawi thung. Abe-a hi sorkar ram man tlawm taka leitu, Moritomo Gakuen company nena inzawmna neiah puh a ni a, hei bakah hian a thuneihna hmanga special economic zone-a sorkarin department thar a hawnna tura aṭhianṭha tak enkawl, Kake Educational Institution thlan tirah puh a ni bawk.

Liberal Party hruaitu, Ichiro Ozawa chuan PM-in lower house a ṭhiahna chhan chu awmze nei lo nia sawiin, an ram mipuite nuih­zatbur leh democracy hmusitna a nih thu a sawi. Social Democratic Party secretary general Seiji Mataichi chuan PM chuan a duh dan anga thil kalpuina atan a thuneihna a hmang sual a ni, a ti. Kyodo News-in kar hmasaa mipui ngaihdan a lakah, PM-in a hun hmaa inthlanpui buatsaih a tum hi mi 64.3%-in an thlawp lo a, 23.7% chauhin ṭha an tih thu an sawi.

Eptu party, Democratic Party (DP) chuan October 22-a in­thlanpui neih turah hian an party hmingin candidate siam a tum lo a, PM Shinzo Abe paihthlak a nih theih nan Tokyo governor Yuriko Koike-i party din thar chu zawm an tum a ni. DP hruai­tu Seiuji Maehara chuan member-te chu DP hminga candidate siam lo tur leh, Koike-a party thar hminga ding zawk turin a ti. Abe-a chu paihthlak a, sorkar thar siam a ngaih thu a sawi. DP leh a thawhpui party te chuan Parliament lower house-ah hian seat 90 an neih pha lo a, Abe-a party Liberal Democratic Party (LDP) member neih zat 287 aṭanga hmun thuma ṭhena hmun khat pawh an nei pha lo a ni.