Ukraine-ah ralthuam dahna hmun a puak

Ukraine-a Vinnytsia biala ralthuam dahna hmun chu puakin kangmei nasa tak a chhuak zui a, mi 3,000 chuang chu hmun him lamah sawnchhuah an ni.

Kangmei chhuahna hi Ukraine khawpui, Kiev chhimthlang lam, km 200 vela hla, Kalynivka khaw bulah a ni. He hmunah hian ralthuam chi hrang hrang ton 180,000 chuang dah a ni.

Prime Minsiter Volodymyr Groysman chuan ralthuam dahna hmuna chhiatna thleng chungchang hi chhui chiang turin thupek a tichhuak nghal a, he hmun hi Ukraine sipaite ralthuam dahna hmun a nih vangin, chhiatna thleng hi tihpalh thil a nih a rin loh thu a sawi. He chhiatna thlenga mawhphurtute chu hrem an nih tur thu a sawi bawk. Ralthuam dahna hmun puak leh kang avang hian a bul vela building eng emaw zat a chhiat phah a, mahse thi leh hliam erawh an awm lo nia sawi a ni. Kangmei chhuak ṭhelh nan hian emergency service chuan sipai thlawhtheihna a hmang a ni.