Dubai-ah Yingluck Shinwartra a awm

Thailand Prime Minister Prayuth Chan-ocha chuan an ram PM hlui, hremna pumpelh tuma ramdanga tlanchhia Ying­luck Shinwatra-i chu Dubai-ah a awm mek niin a sawi.

Yingluck Shinawatra-i hi kum 2014 khan PM a nihna aṭang­a paihthlak a ni a, thuneihna a chan lai hian sorkarin sum tam tak a hloh phahna, rice scheme siamna kawngah a thuneihna dik lo taka hmangah puh a ni. He scheme avang hian sorkar chuan dollar tlukleh­dingawn 8 vel zet a hloh. Sipai chakna hmanga paihthlak a nih hnuah thubuai siamsak a ni a, mahse a thubuai relfel a nih hma hian ramdang­ah a tlanchhia a ni. Thubuai ngaihtuah a nih lai hian Ying­luck-i chuan an puhna te hi phain, politics lama amah an beihna hmanrua zawk niin a sawi a ni.

Nilaini khan Thailand Supreme Court chuan Shinawatra-i a awm lo chungin a thubuai hi a ngaihtuah a, thiam loh chantirin, kum nga tang turin a hrem ta a ni. Court judge-te chuan Yingluck-i hian a kaihhruai sorkarin rice scheme kalpui hi a hlawhchham tih a hria a, mahse titawp turin hma ala duh lo niin an sawi. Yingluck-i u, prime minister hlui tho Thaksin Shinawatra pawh eiruk thubuaiah thiamloh chantir a nih vangin alo tlanchhe tawh bawk a, Dubai-ah hian awm mek nia sawi a ni bawk.