UN-in Myanmar sorkar dem

United Nations Security Council chuan Myanmar sorkar­in a ram chhunga hnam tlem zawk, Rohingya Muslim-te a enkawl dan a dem thu a sawi.

UN Secretary General Antonio Guterres chuan Myanmar ramah raltlanten harsatna nasa tak an tawk chho mek tih sawiin, mihring dikna chanvo palzutna pawh a nasa hle niin a sawi. Hemi rual hian Rohingya helten Rakhine state-a police checkpoint bei a, security mi leh sa 12 an that chu a dem thu a sawi nghal bawk.

Guterres chuan August 25-a Rohingya hel, Arakan Rohingya Salvation Army (ARSA)-te’n Myanmar security force-te an beih aṭang khan boruak ala chhe chho zel tih sawiin, hetianga inbeihna thleng hi a dem takzet tih a sawi. Security force-te beih an nih avang hian Myanmar sipaite chuan Rohingya helte lakah beihpui an thlak zui a, Rohingya civil mi tam takin kut an tuar tel a, mi nuai tel chu Bangladesh-ah an tlanchhe tawh a ni.

ARSA hi Rakhine state-a Islamic state din duhtute an ni a, Pakistan-a piang Rohingya mi, tuna Saudia Arabia rama khawsa mek Ata Ullah kaihhruaite an ni.

Myanmar sorkar-in beihpui a thlak dan chu Rohingya helte chauh bitum lo a, a ram chhunga Rohingya Muslim-te thenfaina atana kalpuiah puhin ram tam takin an sawisel a, civil miten sipaite kut tuarin, an in leh lo te halsak an nih bakah, pawngsual leh thahte an tawk nasa hle nia sawi a ni.

Beihpui thlak a nih hnuah hian Rohingya mi nuai nga chuang chu Bangladesh ramah an tlanchhe tawh nia sawi a ni a, Ningani khan Myanmar aṭanga tlanchhia Rohingya refugee 50 chuang chu an chuanna lawng a chetsual avangin an chin hriat lohin an awm a, mi 19 an thi bawk niin Bangladesh police-te chuan an sawi.