Catalan zirlaiten independence vote lak duhin kawng zawh

Spain aṭanga Catalonia bial independence thlawptu Catalan zirlaite chuan Barcelona-ah kawng an zawh a, independence duh leh duh loh chungchanga vote lak an duh thu an sawi.

Catalonia sorkarin independence duh leh duh loh chungchanga bial mipuite vote lak a tum chu Spain sorkar chuan dan kalh tiin a dodal a, vote thlakna tur hmanrua te pawh police-te’n eng emaw zat an mansak tawh a ni. Vote thlak buaipuitu electoral board pawhṭhiah a ni tawh a, constitutional court judge chuan polling station atana public building hman a nih lohna tura hma la turin police-te pawh a hriattir tawh a ni.

Ningani khan Catalan zirlaite chuan Barcelona khawpui-ah kawng zawhin, vote thlak an duh thu leh, Spain aṭanga inlakhran an duh thute an au chhuahpui a ni. Barcelona police-te chuan kawng zawhnaah hian mi 16,000 vel an tel niin an sawi a, organiser-te erawh chuan mi 80,000 vel niin an insawi thung.

Catalan sorkar chuan sorkar laipuiin dodal mah se, vote lak hi an kaltlangpui dawn tih a sawi. Zirlaite chuan polling station atana hman a nih theih nan school leh university-te chu awmchilh an tum thu an sawi bawk.