Malaysia-in NKorea rama zin khap

Malaysia sorkar chuan an ram mi leh sate chu North Korea rama zin a khap.

Malaysia foreign ministry chuan nimin khan thuchhuah siamin, NKorea-in nuclear programme a kalpui chhunzawm reng avangin an mi leh sate chu NKorea-ah zin a khap tih a sawi a, he thupek hi hriattirna dang tihchhuah a nih hma chuan hman a ni ang.

NKorea ram zin khapna thupek siam hian October 5-a NKorea khawpui, Pyongyang-a Malaysa leh NKorea-in Asia Cupa qualifier football match an neih tur pawh a nghawng tel dawn a ni. Security thil avangin ram pahnihte inkhelh hun hi ṭum hnih sawn hlat alo ni tawh bawk.

Football Association of Malaysia chuan inkhelh tur hian kal phalsak an nih dawn leh dawn loh chungchangah sorkar­in thuchhuah an la siam dawn tih an sawi. North Korea hian UN resolution palzutin, missile leh nuclear test a nei lui fo a, hei vang hian UNSC pawhin an ram hrekna thar a siam a ni.

China pawhin NKorea chungchanga UN resolution chu a zawm ve tur thu a sawi hnuah, a ram chhunga NKorea company-te chu nakkum January thlaah chuan khar vek turin a hriattir. China firm-te nena thawk dun, NKorea company-te chu company khar tur hian UN resolution siam a ni a, September 11aṭangin ni 120 hun pek an nih thu a sawi.