Israel-in West Bank-ah sipai dah belh

Israel-a Ningani zinga firfiakte chetna avang leh Trump peace plan chungchanga Palestine ram nen an innghirngho chhoh reng avangin, Israel chuan a sipaite chu Ningani aṭang khan West Bank-ah a dah belh. 

 

Indo thut a nih pawha kan talbuai lohna turin West Bank-ah hian kan sipaite chu kan dah belh a ṭul a ni, tiin Israel thupuangtu chuan a sawi. Ningani zinga tu tih hriat loh ten car hmanga Jerusalem-a First Station bula bus station-a mipui awmna an beih chungchanga thil sual titu pawh hmuh chhuah tawh a nih thu Israel force-te chuan an tarlang.  

Ningani vek khan Palestinian pathumte chuan Israel sipai leh police officer-te an bei nia sawi a ni a, he inbeihna thlengah hian sipai leh police inhliam mi 14 an awm thu tarlan a ni. Palestinian security service pahnih thah an nih bakah, Palestine thuneitute chuan he thil thleng hi Trump peace plan vanga loh theih loha thinrimna rawn irh chhuak a ni tiin, he thil thleng chungchangah hian thuchhuah hi an siam.   

January 28 khan US president Donald Trump chuan Israel leh Palestine inkara inremna siamna tura a ruahmanna, Mideast Peace Plan, 'Trump peace plan' tih bawk chu a puang zar a ni. Israel chuan US hmalakna hi thlawp mah se, Israel ṭan zawnga US hmalakna a ni tiin, Palestine ram chuan Trump-a peace plan hi a pawm ve lo a ni.