China-in US consulate office khar turin thupek ti chhuak

China chuan an ram Sichuan province-a Chengdu-a US consulate office chu khar turin nimin khan thupek a tichhuak.

Hetianga China-in hma a lak chhan hi Thawhlehnia US sorkarin Houston-a Chinese consulate office darkar 72 chhunga khar turin hriattirna a tihchhuah vang a ni. Hemi thungrulh nan hian China chuan nimin khan an rama Chengdu hmuna US consulate office chu khar turin thupek a tichhuak ve ta nghal a ni. 

Khawvela economy lian ber ram pahnihte hi tun hnai hian an inkar boruak hi a chhe zual hle a, US president Donald Trump leh a kaihhruai sorkar chuan an ramin a buaipui mek, Covid-19 hri hi China hri a nih thu leh he hri darh chhan chu China thiam lohah a puh a, China vang hian hri dona kawnga World Health Organisation (WHO) hmalakna pawh vawi tam US chuan a sawisel tawh a ni. 

Heng bakah hian China-in Hong Kong-a national security law a hman avangin ram pahnihte inkarah hian intihthiam lohna a awm belh phah bawk. US-in Houston consulate office khar tura hriattirna a tih chhuah chhan hi coronavirus vaccine siamna kawnga China-in an information pawimawhte lak ruk a tum vang leh US-a company 100 dawn te chu China hian hack a tum vang nia sawi a ni. 

Mahse China chuan US chhuan­­lam siam hi a pawm lo tih sawiin, consulate khar tir a tum chhan nia a sawi chu thil awih­awm lo tak a nih thu China foreign ministry thupuangtu, Hua Chunying chuan a lo sawi tawh bawk. Hei vang hian an rama US consulate chu khar turin a ti ve nghal a, US-in a thutlukna a sut leh hma chuan khar a ni dawn tih a sawi nghal bawk. 

China ram pumah US hian consulate panga a nei a, Beijing leh Hong Kong-ah pawh a awm a ni. Chengdu hmuna US consulate office hi kum 1985 khan siam a ni a, he hmunah hian hnathawk mi 200 vel an awm a, thawktu zinga mi 150 vel chu Chinese an ni.