Putin-a'n Ukraine-a Zaporizhia leh Kherson region independence a pawm

Russia President Vladimir Putin chuan Ukraine-a Zaporizhia leh Kherson region-te rorelna hran, independence a pawmna thupek a tichhuak.

President Putin chuan, "Ukraine chhim lama Zaporizhia leh Kherson-ten rorelna hran leh independence an puan chu kan pawmpui a ni," tiin Ningania order a tichhuahah a tarlang.

Heng region pahnihte hi mahnia ro inrelna neia lo inpuang tawh, Donetsk leh Luhansk region-te rualin Russia-in a rama chhun­luh tumin a ruahman a ni. Donetsk leh Luhansk inde­pendence hi Putin chuan kumin February thla khan a lo pawmpui tawh a ni.

Russia-in a luah, Zaporizhia leh Kherson bialah hian mipuite chu Ukraine nge Russia rama awm an duh tih vote thlak tir an ni a, 99% velin Russia zawm an duh a ni. Mahse he vote lak hian ram dangte sawisel a hlawh hle thung.

Hetih lai hian UN secretary general Antonio Guterres chuan New York-a chan­chinthar lakhawmtute a kawmnaah, Russia-in Ukraine ram a luahsak chu United Nations Charter bawhchhiatna a ni a, eng dan mahin pawm theih a ni lo, a ti. Russia chet dan chu Ukraine nena an inkar boruak tichhe zualtu tur thil hlauhawm tak a nih thu a sawi bawk.

Putin-a'n Ukraine region pahnihte inde­pendence a pawmna a tihchhuah avang hian nimin khan Ukraine president Volodymyr Zelenskyy chuan emer­gency top-level meeting a ko ve nghal a ni.

Russia beihnaah civil mi 23 an thi
Ukraine khawpui pakhat, Zaporizhzhia-a Russia-in missile a kahchhuah avangin mi 23 an thi a, ṭhahnem takin hliam an tuar tih Ukraine official chuan a sawi.

Zaporizhzhia regional Gover­nor Oleksandr Starukh chuan nimin khan thuchhuah siamin, Russia sipaite hian Russia-in a luahsak mek pana kal, humanitarian convoy chu Russia sipaite hian beiin, mi 23 an thih bakah mi dang 28 an hliam tih a sawi a ni.

Territory awp mek an pan laiin humanitarian convoy 28 velin hliam an tuar tih a sawi. Starukh chuan he convoy hi Russian-occupied territory-a an chhungte va lam tur leh, hmun him lama hruai tuma kal an nih thu a sawi.