Catalan bial mipuiten vote an thlak

Spain aṭanga Catalonia bial independence duh leh duh loh chungchangah nimin khan Catalan mipuite chuan vote an thlak.

Catalonia biala vote thlak tur chungchang hi Spain Constitutional Court chuan dankalh tiin a lo hnawlsak tawh a, Spain sorkar laipui pawhin kaltlangpui lo turin a ti bawk. Mahse Catalan sorkar chuan kaltlangpui a tum thu sawiin, nimin khan vote hi thlak luih a ni ta a ni.

Police-te chuan vote thlak turte hi dangin, polling station-ah vote thlakna tur ballot paper leh box eng emaw zat an mansak a, vote thlak tuma kal mi eng emaw zat an hnawtdarh bawk. Mahse hetichung hian vote thlak tura chhuak hi an ṭhahnem hle niin Catalan official-te chuan an sawi.

Spain sorkarin vote thlak tur hi dan tumin, school leh college-te chu polling station atana hman phalsak lo turin thupek a lo tichhuak tawh bawk. Hei vang hian vote thlak a nih ngei theih nan kar hmasa khan Catalan bial chhunga zirlaite chuan kawngzawhin, voting center atana hman tura ruahman school leh building dangte chu an awmchilh zui a ni.

Nimina Catalan bial mipuite ngaihdan laknaah hian zawhna pakhat chiah zawh a ni a, ‘Catalonia hi independent state ni turin i duh em?’ tih zawhna chauh awmin, Aw leh Aih tia chhanna siam a ni. Catalan sorkar chuan voter te hi an vote thlakna tur hmun ruat kharsak an nih chuan polling station khawiah pawh vote an thlak phalsak an nih thu a sawi.

Catalonia bial hi Spain hmarchhak lama awm niin, ṭawng hran leh culture hran nei an ni a, mi maktaduai 7.5 vel an cheng a, hei hi Spain ram mipui aṭanga 16% a tling. Catalonia bial khawpui, Barcelona-ah hian mi maktaduai 1.6 vel an cheng a ni. Catalonia bial hi a hausa a, Spain ramin a thil thawnchhuah zinga 25.6% hi Catalonia bial ami niin, foreign investment pawh 20.7% a awm a ni.

Kum 2014 November thla khan independence duh leh duh loh chungchangah hian mipuite vote lak alo ni tawh bawk. Hemi ṭuma vote thlak zinga 80% chuan Catalan state hran din hi an thlawp a, mahse vote hi a tla ṭha lo hle a, vote nei zinga a zahve pawhin an thlak lo a ni. Mahse Spain sorkar laipui chuan he vote lak hi ram danpui kalh a ni tiin alo hnawlsak tawh a ni.