Rakhine state-ah school hawn a ni
Myanmar-a Rakhine state-ah security force leh Roihngya Muslim te inbeihna avangin hun eng emaw chen school khar a ni a, hengte hi Inrinni aṭang khan hawn ṭan an ni leh ta. Hetih lai hian Rohingya mi tam tak chu himna zawngin an la tlanchhe zui reng bawk.
August thla aṭanga Myanmar security force-te’n Rohingya Muslim helte laka beihpui an thlak avangin civil mi tam takin an tuar tel a, mi nuai tel chu Bangladesh ramah himna zawngin an tlanchhe tawh a ni.
Rakhine state-a tualchhung buaina thleng avang hian he state-a cheng, Buddish leh Hindu mi 30,000 dawn pawh himna zawngin an tlanchhe bawk.
Education official chuan buaina chhuah hluarna ber, Maungdaw leh Buthidaung khuaah boruak a pangngai chhoh avangin Inrinni khan school hawn an ni leh tawh tih an sawi a, khaw dang boruak pawh thlithlai zel a nih tur thu an sawi.
Rohingya te tlanchhiat chungchangah hian Myanmar sorkar chuan sawisel leh beih a tawk nasa hle a, mahse sorkar official-te chuan Rohingya-te hi tlanchhuak lo tura an ngen thu an sawi a, hetichung hian an tlanchhe lui tho niin an sawi. Kar kalta Ningani khan Bangladesh-a tlanchhiat tum, Rohignya mi te chuanna lawng chu Bangladesh tuipuiah a chetsual avangin mi 60 an thi a ni.