Nau tihtlak khapna dan siamṭhat phutin Dublin-ah kawng zawh

Ireland sorkarin nau tihtlak khapna dan khauh tak a kalpui mek chu siam danglam phutin Inrinni khan an ram khawpui, Dublin-ah mi tam takin kawng an zawh.

Inrinni-a kawngzawh hi ‘March for Choice’ tia vuah a ni. Prime Minister Leo Varadkar chuan nau titlak khapna dan hman mek chungchangah hian nakkumah mipuite ngaihdan lak a duh thu a lo sawi tawh a ni. Ireland hian nau tihtlak khapna dan khauh tak a nei a, nau paitu chu a nunna hlauhthawnawma a awm a nih loh chuan a nau pai tihtlak chu khap tlat a ni. Kum 1983-a siam, Eight Amendment of Irish Constitution chuan naupaitu nu leh a nau pai chu dikna chanvo inang a pe a ni. Dan phalna loa nau titlate chu kum 14 thleng lungin tantir theih an ni. Hei vang hian kumtinin Irish hmeichhe tam tak chuan nau titla turin ram pawnah lam an pan ṭhin nia sawi a ni.

Inrinni-a nau tihtlak khapna dan siam ṭhat phut kawngzawhte hi Dublin-a Parnell Square-ah pungkhawmin, he hmun aṭang hian Parliament panin kawng an zawh a ni. Hemi ni vek hian London-a Irish embassy bulah dan siamṭhat thlawptuten kawngzawh an huaihawt bawk.