Jerusalem-a nawrh huaihawt mi 55 man
Israel police-te chuan Ningani zan khan Jerusalem-a sorkar laka lungawi lohna lantira nawrh huaihawt zinga mi 55 an man. Nawrh huaihawtte hi prime minister Benjamin Netanyahu chenna in bulah pungkhawmin, PM chu bang turin an phut. An rama hripui leng mek dona kawnga a hmalak dante sawiselin, democracy palzutahte an puh bawk a ni.
Tun hnaiah PM Netanyahu laka lungawi lohna lantirin nawrh huaihawt a lo ni fo tawh a ni. Ningani zana man zinga a tam zawk chu intiamkamna neih tirin nimin zing khan chhuah leh nghal an ni a, ni 10 chhung Jerusalem khawpuia an luh khapsak an ni. Ningani zana nawrh huaihawtnaah hian mi 4,000 vel an tel niin police-te chuan an sawi a, zan dar 10:30 velah police-ten an hnawtdarh a ni. Kalsawn duh lote leh police-te chu zanlai velah an innawr buai zui a ni. Police-te chuan mitinin an duh loh zawng lantira nawrh huaihawt turin dikna an nei a, hemi rual hian sorkar thupek palzut leh buaina siam zawnga chetna erawh chu an ngaizam mai dawn lo tih an sawi.