Ukraine indona : Russia-in Zaporizhzhia nuclear plant hotu man

Russia sipaite chuan Ukraine-a Zaporizhzhia nuclear power plant-a director general chu manin an hreng mek a, hei hian facility-a venhimna lamah hlauhthawnna lian tak a rawn siam leh a ni.

Nuclear plant hotu, Ihor Murashov hi plant a pan laiin Zirtawp­ni liam ta khan Enerhodar-ah an man tih Energoatom hotu Petro Kotin chuan Inrinni liam ta khan a sawi.

"Car aṭanga hruaichhuakin a mit an tuamsak a, hmun hming an tarlan lohah an hruai a ni. Russia-in Murashov an man hian Ukraine leh Europe-a nuclear power plant lian ber dinhmun a tiderthawng hle a ni," tiin Kotin chuan a sawi a, Murashov chungchang hi hriat zui an nei rih lo tih a sawi.

He thil thleng chungchangah hian Russia lam chuan sawi an la nei lo. Kotin chuan International Atomic Energy Agency (IAEA) hotu Rafael Grossi chu Murashov chhuah a nih theihnan rang taka hma la turin a ngen.

IAEA chuan Russia thuneitute hnen aṭangin Murashov chu thu zawhfiah tura hren lailawk a nih thu an dawng niin a sawi.

Russia hian March thla khan Europe-a nuclear plant lian, Zaporizhzhia nuclear power plant hi la in, Ukraine staff-te chu an hreng zui a ni. Ukraine leh Russia chuan nuclear plant beituah an inpuh tawn a ni.

Zaporizhzhia nuclear plant-a reactor paruk hi Ukraine awpna hnuaia chhimlam a mi Zaporizh­zhia region, Enerhodar-a awm a ni. Ukraine chuan, Russia sipaiten station chu military base atan an hmang a, an hnathawkte chu silai nen an veng reng tih a sawi.

Murashov hi Zaporizhzhia plant chu Russia sorkar hnuaia nuclear energy plant enkawltu, Rosatom kutah dah duh lotu zinga mi a ni a, mahse Energoatom thupuangtu chuan hei hi an ruk bo chhan a nih a rin loh thu a sawi. Murashov hi security code kawltu a ni a, plant-a hnathawhdan zawng zawng enfiah tu niin, protocol an zawm ṭha em tih zirchiangtu leh Ukraine sorkar hnena report petu niin Energoatom thupuangtu chuan a sawi. Ukraine thuneitute chuan Russia-in Ukraine an run hma lawk khan plant enkawltu atan an ruat a ni.