Hurricane Ian vanga thi mi 44 awm tawh ; President Biden-a'n Florida a tlawh dawn

United States chanchina thlipui thawk na ber zinga mi, Hurricane Ian vanga thi zat chu an pun belh zel a, Inrinni liam ta thleng khan thi zat hriatchian tawh hi mi 44 an tling tawh a ni.

White House chuan president Joe Biden chuan tunkar chhungin chhiatna thlenna hmunte enfiah turin Florida-a tlawh dawn tih a sawi.

Florida state-ah chuan thlipui tlehin thil a tihchhiatte thenfai hna leh, chin hriat loha awmte zawn chhunzawm zel an ni. Kar liamta Nilainia category 4 hurricane tleh hian chenna in, restaurant leh sumdawnna hmun tam tak a len chhia a ni.

Florida Medical Examiners Commission chuan Inrinni zan thleng khan thlipui tlehin chhiatna a thlena thi zat hriat chin chu mi 44 an ni tih sawiin, mahse county tinah thi hmuh belh zel a la nih thu a sawi. Lee County bikah mi 35 an thi a, NBC leh CBS-te chuan thlipui tleh kaihhnawiha thi hi 70 chuang niin an tarlang thung.

US president Joe Biden leh a nupui, Jill-te chuan Nilainiah Florida state hi an tlawh dawn niin White House press secretary Karine Jean-Pierre chuan a sawi. Mahse President-te nupa hian thla hmasaa Hurricane Fiona tuartu, Puerto Rico an pan hmasa phawt ang.