Catalan mipuiten independence an thlawp

Spain-a Catalonia bial mipuiten independence an duh leh duh loh chungchangah Pathianni khan vote lak a ni a, vote thlaktu zinga 90% chuan Spain aṭanga inlakhran an thlawp.

Spain Constitutional Court chuan Catalonia regional govern­ment-in mipuite vote lak a tum hi dankalh tiin a hnawlsak a, vote thlak ni pawh hian police ṭhahnem tham tak duty tirin, vote thlak turte chu dan an ni. Police leh voter-te innawr buainaah mi eng emaw zatin hliam an tuar. Officer-te chuan polling station-a ballot paper leh box-te an mansak a, Spain Prime Minister Mariano Rajoy chuan Catalan mipuite chu dik lo taka vote laknaa tel turin bum an ni, a ti.

Pathianni-a vote thlaknaah hian voter maktaduai 5.3 awm zinga maktaduai 2.2 velin vote an thlak a, Catalan sorkar thupuangtu chua vote tla zinga 750,000 chu polling station kharsak a, bawm te laksak an nih avangin chhiar tel theih a ni lo tih a sawi. Vote thlak zawh hnu hian independence thlawptu mi tam tak chu regional capital Barcelona-ah an pungkhawm a, Catalan hnam puanzar te vaiin an hnam hla te an sa a ni. Hemi ni vek hian independente duh loten Barcelona leh khawpui dangah kawng an zawh bawk.

Trade union leh Catalan asso­ciation 40 chuangte chuan vote thlak nia voter-te chunga police chet dan duh lohna lantirin vawiin hian Catalonia bial pumah nawrh huaihawt an tum. Catalan mipuite dikna chanvo leh zalenna neihte rahbehsak an ni tih an sawi. Catalan sorkar chuan vote thlakni-a buaina chhuak avang hian mi 800 chuangin hliam an tuar niin a sawi. Hetihlai hian Spain interior ministry chuan police offier 12-in hliam an tuar niin a sawi a, mi pathum man an nih thu a sawi bawk. Polling station khar zat pawh 92 niin a sawi a, mahse Catalan sorkar chuan hei hi a dik lo a, hei aia tam daih hi khar a nih thu a sawi thung. Police-te chuan polling station 2,300 zinga 319 an kharsak niin a sawi.

Barcelona Mayor Ada Colau chuan police-te chetdan chu a dem thu a sawi a, mahse Spain Deputy Prime Minister Soraya Saenz de Santamaria chuan police-te chu dan ang taka an chet thu a sawi thung a ni.