Kim Jong-Nam thah thubuai ngaihtuah ṭan

North Korea ram hotu, Kim Jong-un-a unaupa, Kim Jong-Nam-a thah thubuai chu nimin khan Malaysia-a Shah Alam High Court-ah ngaihtuah ṭan a ni.

Kumin February 13 khan Kim Jong-Nam hi Macau pan tura thlawhtheihna a nghah laiin, Kuala Lumpur airport-ah thah a ni. Kim hi hmeichhe pahnih, Indonesia mi Siti Aisyah leh Vietnam mi Doan Thi Huoang-te'n a hmaiah VX nerve agent an tah avangin a thi nia sawi a ni. Nerve agent hi tur hlauhawm tak niin, central nervous sytem a khawih chhia a, Kim hi a hmaia tah a nih aṭanga minute 20 lekah na tak tuarin a thi nia sawi a ni. He thil thleng hi airport CCTV-ah pawh a lang a ni.

Kuala Lumpur airport-a Kim Jong-Nam thah a nih avang hian Malaysia leh North Korea inkar boruak pawh a chhiat phah hle a, ram pahnihte hian palaite an inhnawhchhuah sak ve ve a ni. Hmeichhe pahnihte chuan tualthata an puhna chu phain, reality TV show-a infiamnaa tel tur anga hrilh an nih thu an sawi. An lawyer-te pawhin pawikhawihtu dik tak chuan Malaysia a chhuahsan tawh a, hmeichhe pahnihte hian tualthahnaah hian an fihlim ngei tih pawh court-ah an finfiah dawn tih an sawi. Hmeichhe pahnihte hi thiam loh chantir an nih chuan thi tura hremna thlenga pek theih an ni ang.

Kim Jong Nam thah thubuai hi Kuala Lumpur-a Shah Alam High Court-ah ngaihtuah a ni a, buaina a chhuah venthawn thilah police officer 200 zet duty tir an ni.