UNICEF-in Rohingya naupang tan school 1300 hawng dawn
United Nations International Children's Emergency Fund (UNICEF) chuan Myanmar aṭanga Bangladesh rama tlanchhia, Rohingya Muslim naupangte lehkha zirna turin educational center 1,300 chuang a hawng dawn.
UNICEF hian Rohingya raltlante awmna, Bangladesh-a Cox's Bazar-ah school 182 a enkawl mek a, heng hmunah hian zirlai 15,000 chuang an awm a ni. UNICEF chuan nakkumah naupang nuai hnihte lehkha zirtir an nih theihna turin learning center hi hawn belh zel a tum a ni.
Myanmar security force-te'n Rakhine state-a Rohingya hel laka beihpui an thlak hnuah Bangladesh ramah hian Rohingya nuia nga vel an tlanchhe tawh a, an zingah hian naupang tam tak an tel a ni. Bangladesh-a UNICEF palai, Edouard Beigbeder chuan raltlan naupang tam takin lehkha an zir chhunzawm thei lo chu thil pawi tak a nih thu a sawi a, hei vang hian heng naupangte hi lehkha zirtir an nih theih nan theihtawpin hma an la zel dawn tih a sawi.
Learning centre-ah hian naupang kum 4-6 te lehkha zirtir an ni a, kum 6-14 inkarte chu non-formal basic education pek an ni bawk. Learning centre tinte hi shift thuma kalpui an ni a, shift khatah naupang 35 zel an awm a ni. Bengali, English, Maths, Burmese, Science leh Arts-te zirtir ṭhin an ni. Naupangte hi lehkhabu, pen, colouring pencil, school bag leh lehkha zirna hmanraw dangte pek an ni bawk.