Las Vegas-a pawikhawihna thleng chhui zel
Pathianni zan-a Las Vegas-a open-air music festival chhimtute pawng kah an nih avanga thi chu mi 59 an tling tawh a, mi dang 527 in hliam an tuar bawk. He pawikhawihna thlen dan hi chhui chian mek a ni.
Music festival chhimtute hi festival neihna bul, Mandalay Bay Hotel chhawng 32-na aṭangin kum 64 mi, Stephen Paddock-an a pawng kah a ni. Mipui pungkhawm a pawng kahna chhan hi hriat ala ni lo. Police-te chuan pawikhawihtu Paddock hi an kaphlum ve nghal a, a awmna room-ah hian silai 23 hmuh a ni.
Islamic State (IS) firfiak pawl chuan he pawikhawihna c hi an pawl tih niin sawi mah se, investigator-te chuan silai hmetpuaktu leh IS firfiakten inzawmna an nei tih finfiahna an la hmu lo niin an sawi. Investigator ṭhenkhat chuan silai hmetpuaktu hi rilru lam harsatna nei nia an ngaih thu an sawi a, mahse hei pawh hi finfiahna a la awm lo.
Silai hmetpuaktu, Stephen Paddock hi Las Vegas hmarchhak lam, Mesquite khuaa cheng a ni a, hmeichhe pakhat Marilou Danley nen an cheng dun ṭhin. Marilou Danley hi Japan ramah a zin a, he thil thlengah hian inhnamhnawihna a nei lo nia a lan thu police-te chuan an sawi.
IS firfiak pawl chuan Las Vegas-a pawikhawihna hi an pawl thlen niin a sawi a, Paddock hian thla eng emaw zat liamtaah khan Islam sakhua a zawm niin a sawi. Mahse an thusawi finfiahna hi engmah an tilang tel lo.
Police-te chuan Paddock hi September 28 khan Mandalay Bay Hotel-ah hian thlengin, Ms Danley tih document a hmang niin an sawi. A thlenna suite-ah hian room pahnih awmin, suitcase 10 hmuh a ni.