Palestinian PM-in Gaza a tlawh

Palestinian Authority Prime Minister Rami Hamdallah chuan Thawhṭanni khan Gaza Strip a tlawh. Kum hnih hnua Gaza a tlawh lehna hmasa ber a ni.

West Bank-a rorellai, Fatah leh Gaza Strip-a roreltu, Hamas pawlte chuan inzawmkhawm dan an ngaihtuah mek a, Hamdallah chuan Gaza a tlawh pawh hi Palestinian unity sorkar a din theihna tura hmalakna pawimawh tak a nih thu a sawi.

Press conference a neihah, Hamdallah chuan an thil tum tipuitling tur chuan lungrual taka hma an lak ho a ngaih thu sawiin, Palestinian political system chu venhim a ngai a ni, a ti. Hamdallah hian kum 2014-a Gaza war laia Israel sipaiten mi tam tak an tihhlumna, Shujayea bial pawh tlawh nghal a tum a ni.

Kum 2007 parliament inthlanah khan Hamas-ten President Mahmoud Abbas-a party, Fatah an hneh a ni. Mahse Fatah ten inthlan result hi an pawm loh avangin pawl pahnihte inkarah buaina nasa tak a chhuak a, Gaza aṭangin Fatah te hi umchhuah an ni zui a ni. Hemi hnu hian Hamas te chuan Gaza Strip-ah ro relin, West Bank-ah Fatah-ten ro an rel zui a ni. Pawl pahnihte hian inzawm dan ngaihtuahin inbiakna an nei fo a, mahse an la hlawhtling thei lo.