Brazil President inthlan thawh hnihnaah Lula leh Bolsonaro an inhmachhawn dawn
Brazil President thlanna neih zawh takah, a thawh khatnaah tling tur a vote hmuh ngai zat hmu pha an awm lo. Hei vang hian candidate zingah vote hmu sang zual pahnihte chuan inthlan thawh hnihna an hmachhawn dawn.
Inthlan thawh hnihnaah hian president hlui, left-wing mi Luiz Inácio Lula da Silva leh president ni lai Jair Bolsonaro an inkhing dawn a ni.
Inthlan thawh khatnaah hian Lula leh Bolsonaro bakah candidate dang pakua an awm. Vote nei hi mi maktaduai 156 vel an awm bawk.
Lula hi inthlan thawh khatnaah hian vote hmu sang berin, vote tla aṭangin 48% a hmu pha. Mahse President tling tur hian vote tla aṭanga 50% hmuh phak a ngaih avangin a tling zo ta bik lo a ni. Bolsonaro hian 43% a hmu bawk a ni. Brazil ramah hian President thlannaah vote thlak thawh khatnaa tling hi kum 24 chhung an awm tawh lo a ni.
Inthlan thawh hnihna hi October 30-ah neih a ni ang.
Lula leh Bolsonaro tan an result hian inthlan thawh hnihna neih turah beiseina sang tak a siam ve ve a ni. Lula hi kum 2018 inthlanah khan eiruk thubuaia thiam loh chantir vanga jail-a a tan lai anih avangin a chuh thei lo a, tun ṭumah hian ropui takin a rawn kir leh thei a ni. President Bolsonaro hi inthlan neih hmaa mipui ngaihdan lak hrang hrangah Lula a bei pha lo hle turah ngaih a ni a, mahse mipuite rinlawk ang lo taka a che ṭha hian beiseina pawh a siam sak hle rin a ni.
Lula chuan Amazon rainforest vawnghim leh humhalh turin theihtawp a chhuah tur thu a sawi a, Bolsonaro erawhin economy lama hmasawn tur chuan rainforest hmun ṭhenkhat chu phalrai a ngai tawh niin a sawi ve thung.