Pakistan-in firfiak pathum khaihlum

Pakistan army chuan nimin khan firfiak pathum khaihlum an nih thu a sawi.

Army thuchhuah chuan firfiak pathumte hian rama pawikhawihna thleng hrang hranga inhnamhnawih niin a sawi a, Peshawar Airport-a Pakistan International Airline (PIA) thlawhtheihna beihnaah pawh a tel niin a sawi. Civil mite beihnaah te, Pakistan armed force leh law enforcement agency-te beihnaah pawh an tel a niin a sawi.

Firfiak pathumte hi military court-a an chungthu ngaihtuah a nih hnuin, nimin khan Khyber Pakhtunkhwa province-a jail chhungah khaihlum an ni. Khaihlum an nih hma hian magistrate hmaah pawikhawihna an thlen hrang hrangte pawh an pawm thu an hrilh bawk a ni.

Kum 2014 December thla-a firfiak ten army school an beih hnu khan firfiaka chetna kaihhnawih thubuaite chak zawka ngaihtuah a nih theih nan military court hi din a ni. Army school beihnaah hian mi 150 an thi a, thi zinga a tam ber chu zirlai an ni. Military court hi kum hnih chhung atana din ni a, mahse parliament chuan huntiam ral hnuah kum hnih dang atan a pawhsei sak leh a ni. Military court-a thiam loh chantirte hian president hnenah appeal an thlen leh thei a, mahse president hian ngenna tam zawk hi chu a hnawlsak a ni.