France-in anti-terrorism law thar pawm

France Parliament chuan Thawhlehni khan anti-terrorism law thar a pawm. Anti-terrorism law thar siam hian sawisel a hlawh hle a, activist tam zawk chuan he dan thar siam hian an ram chu emergency dinhmunah a dah reng dawn niin an sawi.

Parliament-a bill ngaihtuahnaah hian a thlawp lamah vote 415 tlain, a duh lo lamah vote 127 a tla a, member 19 in vote an thlak lo thung.

Kum 2015-a firfiakten Paris khawpui an beih hnu khan France sorkar chuan rampumah emergency a puang a, hei hi pawhsei chhunzawm zel a la ni. Kum 1960 chhoa Algerian War hnua France rama emergency puan rei ber ṭum a la ni.

French human rights leh civil rights activist, Yasser Louati chuan anti-terrorism law chuan sorkar chu thuneihna sang tak a pe dawn a, hei hi France ram tan a ṭha lo niin a sawi. Louati chuan kum hnih chhung ram puma emergency puan ni mah se, engmah a thlak danglam lo a, a ṭha tawk lo tih a lang reng niin a sawi bawk. He dan hman hian ram mipuite thinlungah hlauhna a thlen zawk a, a bikin Muslim te a tihlau zual a niin a sawi.

Anti-terrorism law thar hnuaiah hian police-te chu thuneihna sang zawk pek an ni dawn a, warrant nei kher lo pawhin an mi rinhlelhte leh an in te chu an dapsak thei dawn a, zanah pawh an dap phalsak an ni ang. Hei bakah hian official-te chuan thubuai ngaihtuah hmain house arrest-in mi an hreng thei dawn bawk a ni. Sakhaw hmun pawimawh punkhawm leh kharsak chungchangah thuneihna pek a ni dawn bawk a ni.