Iraq President hlui a thi

Iraq President hlui Jalal Talabani chu kum 84 mi niin Thawhlehni khan Germany-ah a thi.

Kurdish politician, Jalal Talabani hi US kaihhruaia Saddam Hussein paihthlak a nih hnu, kum 2005-2014 inkar khan Iraq president atan thlantlin a ni a, Kurdish bial tan mi paiwmawh tak a ni. Kurds mipuite chuan mam (uncle) Jalal tiin an sawi ṭhin.

Kurdistan bialin Iraq aṭanga inlakkhran duh leh duh loh chungchang vote an lak hma khan a hriselna dinhmun a tlakhniam avangin Germany-ah hruai a ni. Iraqi Kurdish politician, Zana Said chuan Talabani chuan an ui takzet tih sawiin, Arab, Kurds leh hnam tenau zawkten president an ui awmchhun niin a sawi bawk a ni.

Talabani hi politician ṭha leh mi biangbiak thiam tak a ni a, Kurdish independence thlawp mahse an rama pawl hrang hrang inkara inhriatthiam lohna awm ṭhinte siamṭhat tumin a thawk nasa hle.

Saddam Hussein paihthlak a nih hnua inthlan neih hmasak ber, kum 2005 April thla khan Talabani hi president atan thlan tlin a ni a, kum 2014 thleng khan he dinhmun hi a chelh zui a ni.