Suu Kyi-i hnena chawimawina pek hnuhkir

Oxford City Council chuan Myanmar ram hruaitu Aung San Suu Kyi-i hnena kum 1997-a chawimawina a pek, 'Freedom of Oxford' chu a hnuhkir sak leh.

Myanmar rama Rohingya Muslim-te tawrhna thleng mek chungchangah Suu Kyi-i chu inrawlh duh loha puh a ni a, hei vang hian Oxford City Council chuan he chawimawina kawl zel tlak a ni lo niin a sawi.

August 25-a Rohingya helten Rakhine state-a security post an beih hnuah, security force-te chuan beihpui an thlak zui a, hei vang hian Rohingya muslim nuai tel chu Bangladesh ramah an tlanchhe tawh a ni.

Security force-te beihpui thlakna vanga Rohingya mi tam takin harsatna an tawh chungchangah Myanmar sorkar chuan dem leh sawisel a hlawh hle a, Suu Kyi-i pawh he thil thleng chungchangah a ṭawng chhuah duh loh avangin sawisel a tawk fo a ni.

Oxford City Council leader Bob Price chuan chawimawin an pek tawh hnuhkir leh chu Suu Kyi-i thiltih dana an lungawi lohna lantirna tur dik tak niin a sawi a, an rama mi tam tak tawrhna thleng chungchangah aw a chhuah miah loh chu mak a tih thu a sawi bawk a ni.

Kar hmasa khan Oxford-a St Hugh's College chuan an college-a Suu Kyi-i thlalak an tar cu an lo lathla tawh bawk a ni.