Las Vegas shooting : Paddock-a bialnu thu zawt fiah

Las Vegas-a country music festival chhimtute pawng kah a, mi 59 kaphlumtu Stephen Paddock-a bialnu, Marilou Danley-i chu thu zawhfiah a ni.

Marilou Danley hi casino-a thawk ṭhin niin Paddock nen hian Nevada-ah an cheng dun a, pawikhawihna a thlen hma hian Philippines-ah chawlh hmang turin a zin chhuak a ni. US-a a kir leh hnuah Nilaini khan police-te chuan thu an zawtfiah a, Paddock-a chu zaidam, midang ngaihsak leh ṭawng tam lo tak a nih thu sawiin, pawi a khawih tum chungchang hi engmah hriat lawkna a neih loh thu a sawi.

Danley-i chuan kar hnih liamta khan Paddock hian Philippines-a a chhungte a tlawh theihna tur ticket a pe tih a sawi a, a zin chhuah hnu hian dollar 100,000 thawnin, in leina tur tiin a hrilh niin a sawi bawk a ni.

Kar kalta Pathianni zana Las Vegas-a open air concert chhimtute chu Paddock hian hotel-a thlenna aṭangin a pawng kah a, eng vanga he thih hi ti nge a nih hriat a la ni lo. He pawikhawihna hi tunhnaia US-a inpawngkahna thleng rapthlak ber a ni. Mi 59 an thih bakah mi 500 chuangin hliam an tuar a ni. Police-te chuan Paddock-a hi an kaphlum ve nghal a, hotel-a a car-ah puak thei lam chi thil bakah silai mu 1,600 zet an hmu a ni.

Sheriff Lamardo chuan Paddock-an pawikhawihna hetiang thil a tih chhan hi an la hre thei lo a, he thil thleng leh firfiakte inzawmna pawh a hriatloh thu a sawi. Paddock hian thurualpui a nei em tih pawh chhui mek a ni thu a sawi bawk.

US President Donald Trump chuan Nilaini kahn pawikhawihna thlenna, Las Vegas hi a tlawh a, inkahna rapthlak tak thlenga thi chhungte chu America chuan a tuarpui takzet tih a sawi. Hemi rual hian midangte nunna chhanna atana theihtawp chhuahtute a fak thu a sawi bawk. First Lady Melania Trump chuan hliam tuarte leh chhanchhuah hna thawktu ṭhenkhatte a hmu bawk a ni.