Iraq sipaiten Hawija khua an bei

Iraq sipaite chuan Islamic State (IS) firfiakte kuta awm, Hawija khua chu laklet tumin an bei.

Nilaini khan sipaite hian Hawija khua hi luhchilhin, firfiakte nen nasa takin an inbei zui a ni. Hemi hma hian sipaite chuan chhim lama Rashad airbase chu firfiakte kut aṭang hian an laksak tawh bawk.

Iraq sipaite hian kumin July thla khan Iraq khawpui pawimawh, Mosul chu firfiakte kut aṭang hian an lo lalet tawh bawk. He khawpuia firfiakt chu a bula Tala Afar khua leh, khawthlang lama thlaler hmun, Syria ramri bulahte an tlanchhia a ni.

September 21 aṭang khan Iraq sipaite hian Hawija leh a chhehvela khuate laklet tum hian beihpui an thlak a, US kaihhruai ṭangrual ramte chuan khawmual leh boruak lamah an lo pui bawk. Ni hnih huah Shirqat khua an lalet nghal a, hemi hnu hian chhimchhak lama Rashad airbase leh Hawija leh Riyadh khuate laklet tumin an bei zui a ni.

Military commander Lt. Gen. Abdul Amir Yarallah chuan Hawija khua lak tumin tih takzeta beihpui thlak a nih thu a sawi a, officer-te chuan khawpui hmarthlang lama Nidaa leh Askari district-te an luhchilh a, IS sniper pathum an kahhlum bakah, bomb tipuahna tura an ruahman motor pahnih pawh an tihchhiat sak niin federal police chief Raed Shakir Jawdat chuan a sawi.

United Nations chuan Hawija khaw chhungah hian civil mi 78,000 vel an la tangkhang mek niin a sawi a, Firfiakte leh security force-te inbeih hnuah mi 12,500 chu an tlanchhuak tawh a ni.