NKorea-in Japan ram chungah missile a kap chhuak

North Korea chuan nimin khan Japan lamah intermediate-range ballistic missile an kap tih South Korea chuan sawiin, NKorea hian US thawhpuite bitum zawngin ralthuam enchhin­na a kalpui mek a ni, a ti.

North Korea lamin January thlaa US territory, Guam kapthleng thei Hwasong-12 intermediate-range missile an enchhin hnua hetiang missile an enchhin lehna hmasa ber a ni a, kum 2017 hnua Japan ram chunga missile a kahchhuah vawi khatna a ni bawk.

Japan prime minister office chuan missile pakhat chu NKorea aṭangin Japan ram chungah kah a ni a, Pacific tuipui lamah a tla niin a sawi. He thil thleng vang hian Japan thuneitute chuan 'J-alert' tichhuakin, hmarchhak bial lama chengte chu an hnaihvai inah insawnchhuak turin a ti a, hei hi kum 2017 hnuah alert an tihchhuah lehna hmasa ber a ni.

Hokkaido leh Aomori bialah pawh rel service tihtawp lailawk a ni hman a, mahse sorkarin NKorea missile kahchhuah hi Pacific tuipuiah a tla tih a sawilan hnuah tlan chhunzawm tir lehnghal an ni.

Japan prime minister Fumio Kishida chuan thu­thar lakhawmtute a kawmnaah, "He thil thleng leh, tunhnaia NKorea hmalakna zo zaite hi pawisak nei loa chetna a ni a, ka demin hrem tuar tlak an ni," tiin National Security Council chu hmalak dan tur a sawipui dawn tih a tarlang.

Japan chief cabinet secretary Hirokazu Matsuno chuan NKorea missile kahchhuah avanga chhiatna thleng report an dawn mai loh thu sawiin, missile hi minute 22 chhung a thlawh hnuah an rama exclusive economic zone-a tuipuiah a tla a ni, a ti.

South Korea-a Joint Chiefs of Staff pawhin NKorea inland area hmar lam aṭanga ballistic missile an kap­chhuak lai an hmuh thu a sawi. South Korea president Yoon Suk Yeol chuan NKorea-in missile a kahchhuah hi km 4,000 thleng kap thei intermediate-range missile a ni, a ti bawk.

NKorea hian tunhnai ni 10 chhungin missile panga an enchhinna ni tawhin, South Korea leh United States-in bilateral military drill an huaihawt leh, kar hmasa lama Japan-in an lo chhim ve avanga lungawi loin a kapchhuak nia ngaih a ni. A hma aṭangin drill neih tur hi a lo sawisel tawh a, an ram run tura inbuatsaihna tiin a sawi sak a ni.

A hmaa missile a lo enchhin pali chu short-range niin, Korean Peninsula leh Japan inkara tuipuiahte an tla a ni. Heng missile-te hi South Korea kap pha vek an ni. Kumin chhungin ṭum 20 enchhinna a neih tawhah, missile hi 40 vel a kapchhuak tawh.