Ecuador tan-ina buaina chhuakah mi 15 thi tawh

Ecuador-a khawpui pakhat, Latacunga tan-inah Thawhṭanni khan buaina chhuakin tang zinga 15 an thi a, 21 velin hliam an tuar tih SNAI prison agency chuan a sawi.

President Guillermo Lasso chuan damdawi tawlhrukna kawngah thuneitu zawk inchuhna avanga gang inkara intihbuaina thleng niin a sawi.

Thuneitute chuan buaina chhuak thi te ruang hi an enfiah mek tih official-te chuan sawiin, Latacunga huamchhunga Cotopaxi province governor Oswaldo Coronel chuan tan-in boruak chu thunun a ni tawh tih a sawi bawk. Thi 15 awmin, hliam tuar 21 zingah 14-te chu damdawi-inah hruai an ni tawh a ni, a ti.

Nikum khan Ecuador ramah tan-in hrang hrangah buaina chhuak vangin tang zinga 316 in nunna an lo chan tawh a ni.

Kumin July thla khan Santa Domingo tan-inah tang 13 thah an ni a, a hma thla hnihah he tan-inah vek hian buaina chhuak vangin mi 43 an lo thi tawh bawk.

Inter-American Commi­ssion on Human Rights chuan Ecuador prison system hi sorkarin a ngaihthah a, policy mumal tak an nei lo a, tangte dinhmun pawh a chhe hle niin a sawi.

Ram chhunga tan-in hrang hrangte hi mi 33,500 vel awmna tura duan a nih laiin, a awm theih zat bituk aia 11.3% a tam an tang mek a ni.