Rohingya-ten ṭanpuina dil

Myanmar-a Rakhine state-a Rohingya Muslim-te chuan ei tur leh mamawh dang tam tak an tlachham ṭan tawh tih sawiin, ṭanpui ngaiin an awm mek nia sawi a ni,.

Myanmar security force-ten August thla aṭanga Rakhine state-a Rohingya hel laka beihpui an thlaknaah Rohingya civil mi tam tak chuan tuarin, mi nuai nga vel chu Bangladesh ramah an tlanchhe tawh a ni. Tlanchhe ve lo, Rakhine state-a la awmte chu an dinhmun a chhe hle tawh niin chhawmdawl han thawktu ṭhenkhat chuan an sawi.

Buthitaung Town­ship-a chhawmdawl hna thawktu, Abdulla Mehman chuan Kswan Dine khuaa Rohingya 2,000 chuang la awmte chuan chaw ei tur an nei tawh lo a, thil dang mamawh pawh an tlachham tawh niin a sawi. Mipuite chu an chetvel kawngahte khuahkhirh an nih avangin an duhna hmunah pawh an chhuakvak thei lo tih a sawi a, mi tam tak chu rilṭamin an awm mek a ni, a ti.

Rakhine hmarlama King Taung, Bura Shida Para, Kyar Gaung Taung leh Sein Daung khuaahte pawh Rohingya-te chuan ei tur an tlachham ṭan tawh a, sipaite leh Buddhist te chuan an ei tur leh ranvulhte an ruksak niin an sawi.

Human Rights Watch chuan Rakhine state-a Rohingya te chhawmdawlna tur thawnluh a nih thuai loh chuan mi tam tak thih mai hmabakin an awm mek niin a sawi a, tunkar tir lama Rakhine state hmarlam tlawh kualtu, diplomat 20-te chuan mipuite dinhmun chu a chhe hle a, inthliar hranna awm loa mipuite ṭanpui leh chhawmdawl hna kalpui thuai turin Myanmar sorkar an phut a ni.