Catalan independence puanin nghawng a nei lo ang : Spain PM

Spain Prime Minister Mariano Rajoy chuan Catalan bial chuan Spain aṭangin independence puang mah se hei hian nghawng a neih loh tur leh, a ṭul a nih chuan Cataalonia autonomous status paihsak tura constitutional power hman a nih tur thu a sawi.

Kar kalta Inrinni khan Spain ram khawpui hrang hrangah Spain inpumkhatna duhna lantira kawngzawh huaihawt a ni. Khawpui 50 chuangah boruak ṭha tak hnuaiah kawngzawh hi huaihawt a ni. Kawngzawhnaa telte chu thawmhnaw vara inthuamin, an rama boruak ṭha tak a awm theih nan sorkar laipui leh Catalan hruaitute chu inbe tura an duh thu an sawi a ni.

Spain inpumkhat duha kawngzawh hi Catalonia khawpui, Barcelona-ah pawh neih a ni a, kawngzawhte chuan hruaitute chu inbiakna nei tura an phut thu an sawi a, political hruaitute an demna thuziakte pawh an keng tel a ni.

Spain sorkar leh constitutional court-in a khap chungin October 1 khan Catalonia sorkar chuan independence duh leh duh loh chungchangah mipuite vote a la a, vote tla aṭanga 90% zet chuan indan hi an thlawp a ni. Mahse sorkar laipui chuan he vote lak hi Spain 1978 constitution hnuaiah an dan kalh a nih thu sawiin, a pawm lo tih a sawi. Vote thlak tur dang tur hian Spain sorkar chuan police ṭhahnem tak a tir lut a, ballot box leh vote thlakna tur hmanraw dangte an mansak a, polling centre pawh eng emaw zat an kharsak bawk. Police leh vote thlak tura chhuakte innawr buai avangin mi eng emaw zatin hliam an tuar a ni. Catalonia sorkar chuan police-te chetdan hi na takin a sawisel a, civil mite kutthlakah a puh a ni.

Catalan hruaitute chuan an vote lak hi Spain sorkarin pawm lo mah se, tunkar hian Spain laka independence an puan thu hi puanchhuah an tum thu an sawi. Hetih lai hian Catalan hruaitute hi an thu a inhmulo ṭan nia sawi a ni a, ṭhenkhatin Spain aṭanga zalenna puan chhuah thuai an duh laiin, hruaitu ṭhenkhat chuan sorkar laipui nena an inhriatthiam lohna chinfel tura inbiakna neih phawt an rawt thung.