Hurricane Nate-in US chhim lam nuai

Thlipui hurricane Nate chuan Pathianni zing khan US chhim lam a nuai. Thlipui hian central America nuai hmasain, Nicaragua, Costa Rica leh Honduras-ahte mi 25 an thi a ni.

US National Hurricane Centre chuan nimin zing dar 1:30 vel khan thlipui hian Biloxi, Mississippi a thleng a, thlipui tleh hian tuifawn pawh nasa tak a siam tel niin an sawi. Hurricane Nate hi darkar khata km 136 vela chakin a tleh a ni.

New Orleans Mayor Mitch Landrieu chuan thlipui tleh dawn vang hian kar kalta Inrinni khan emergency a puang a, thlipui thleng tur lakah hian theihtawp an lo inbuatsaih thu a sawi. Mississippi official-te pawhin state of emergency an puang a, Louisiana thuneitute chuan thlipui thlen hma hian tuipui kama chengte chu hmun him lama insaseng turin an lo hriattir lawk bawk.