Turkey leh US-in visa service titawp
Turkey leh US embassy chuan thuchhuah siamin, visa service an tihtawp lailawk ve ve thu an sawi.
Ankara-a US embassy chuan Turkey-a a mission leh thawktute himna chungchang chu ennawn a ngai nia sawiin, Turkey tana visa service a tihtawp lailawk thu a sawi a, hemi hnu lawk hian Washington-a Turkey embassy chuan visa service a tihtawp thu hi a sawi ve leh nghal a ni.
Kar hmasa khan Turkey-a US consulate-a thawk pakhat chu nikuma Turkey sorkar paihthlak tuma beihna inhnamhnawiha puhin thu zawhfiah tura hren a ni. He thil thleng hi US sorkar chuan a dem thu sawiin, thu belhchian dawl lo a nih thu a sawi a, hei vang hian ram pahnihte inkar boruak pawh a chhiat phah hle a ni. US consulate-a thawk an man hi Turkey mi a ni. Nikum July thla khan Turkey sorkar hi paihthlak tuma beih a ni a, he thila mawhphurtu berah US-a cheng mek Fethullah Gulen chu puh a ni a, mahse Gulen chuan an puhna hi a pha thung. Turkey sorkar chuan Gulen hi an rama thawn kir turin US a lo nawr fo tawh a ni. Sorkar paithlak tuma inhnamhanwiha puh mi 40,000 chu man an ni tawh a, sorkar hnathawk mi 120,000 vel chu ban leh hrem an ni tawh bawk.
US sorkar chuan Turkey-a US diplomatic facility hrang hrangah non-immigrante visa service tihtawp anih thu a sawi. Non-immigrant visa hi US-a medical treament, bussiness, lehkha zir leh hnathawk lailawk tura kalte tana pek ṭhin a ni.