Bangladesh HM in Myanmar tlawh dawn

Bangldesh Home Minister Asaduzzaman Khan chuan tun thla chhung hian Myanmar ram tlawh a tum a, Myanmar aṭanga Rohingya tlanchhiatte thawn kir an nih leh dan turte Myanmar thuneitute a sawipui ang.

Asaduzzaman Khan chuan Bangladesh rama Rohingya tlanlutte chu Myanmar rama thawn kir vek an duh tih a sawi a, rang zawka thawn kir hna hi kalpui a nih theih nan Myanmar thuneitute chu a be dawn tih a sawi.

Home Minister chuan Rakhine state aṭanga Bangladesh rama Rohingya lutte chu uluk taka an chhinchhiah zel thu sawiin, sorkar chuan raltlante-te bio-metric data chhinchhiahna tur camp pawh a siam tih a sawi. Camp siamah hian raltlan 91,423 chhinchhiah an ni tawh a, nitin mi 9,000 dawn ziahluh belh ṭhin an nih thu a sawi.

Bangladesh Foreign Minister Abul Hassan Mahmood Ali pawhin Rohingya-te buaina chu boruak ṭha tak hnuaia chinfel an duh thu a sawi. Minister hian Thawhṭanni khan Dhaka-a State Guest House-ah press conference a nei a, he hunah hian Australia, China, Egypt, France, Italy, Japan, Russia, Sweden, US, UK, Germany, Canada, India, Netherlands, Vatican, Denmark, Spain, EU, Myanmar, Singapore, Thailand, Indonesia, Vietnam, Philippines, Malaysia, Brunei, Switzerland leh Norway palaite pawh an tel a ni.

Bangladesh sorkar chuan Rohingya te buaina chingfel tur hian ramdang palaite pawh an theih ang anga hma la turin a ngen a, Bangladesh-a raltlan lut pung chak lutuk avang chuan harsatna an tawk mek a, hetihlai hian Rakhine state-ah Rohingya te hian beih tawk tawh lo mah se tlanchhia hi an la pun belh zel niin a sawi.