Independence puang lo turin Catalan hruaitute nawr

Catalonia, Spain aṭanga independence duh lo tute chuan an bial hruaitute independence puan an tum chu ti lo turin an nawr.

Kar kalta Inrinni khan Catalo­nia khawpui, Barcelona-ah Spain aṭanga indan duh loten kawng an zawh a, Spain ram khawpui dangah pawh inpumkhat duhna kawngzawh hi huaihawt a ni bawk. Barcelona-a kawngzawhnaah hian mi nuai li vel an tel nia sawi ani.

October 1-a Spain aṭanga indan duh leh duh loh chung­changa vote laknaah, vote tla aṭanga 90% in independence hi an thlawp a ni. Catalan Parliament-ah vote lak a ni leh ang a, hemi hnu hian Catalan President Carles Puigdemont chuan Spain aṭanga independence hi a puan rin a ni.

Mahse Spain sorkar chuan Catalan mipuite vote lak hi a pawm lo a, Catalan parliament-a vote lak a nih leh chuan a ṭul anga chhan let a tum thu a sawi. Spain Deputy Prime Minister Soraya Saenz de Santamaria chuan Catalan sorkar chu thutlukna siam mai lo turin a ngen a, a tuartu tur chu mipuite an ni, a ti. Catalonia sorkar hian independence hi a puang lui a nih chuan sorkar laipui chuan regional government thuneihna chu a thunun sak mai a ngai dawn niin a sawi.

Spain Prime Minister Mario­na Rajoy chuan Spain ṭhendarh chu a remti dawn lo tih a sawi a, Catalonia bial indan tum chu dang turin dan hnuaiah theihtawpin an bei dawn dawn a ni,a ti.

Catalonia bial indan tum hi Europe ram dangte pawhin an thlawp lo a, Spain ram inpum­khatna chu an duhpui ber thu an sawi. France sorkar chuan Catalonia chu a pawm dawn loh thu a sawi a, independence hi a puang lui a nih chuan Euro­pean Union aṭang pawhin hnawh­chhuah nghal a ni dawn niin a sawi. EU pawhin independent Catalonia hi a thlawp dawn lo tih a sawi bawk.