California-ah Ram kang vangin emergency puang

California, US-ah ram nasa takin a kang a, Governor Jerry Brown chuan Thawhṭanni khan county pathum - Napa, Sonoma leh Yuba-ah emergency a puang.

Pathianni zan khan hmun 20 chuangah ram hi kangin thli a tleh tel avangin a darh chak hle a, kangmei chhuak vang hian mi 10 an thi a, midang pahnihin hliam an tuar. Kangmei chhuak hian building 1,500 vel kang chhiain, Thawhṭanni tlai khan mi 20,000 chuang chu hmun him lamah sawnchhuah an ni. Office of Emergency Services thupuangtu, Brad Alexander chuan thi zat hi an la punchhoh a rin thu a sawi.

California Department of Forestry and Fire Protection (Cal Fire) assistant deputy director, Daniel Berlant chuan ram kan chhan hi hriatchian a la nih loh thu sawiin, chhui chian mek a ni, a ti. Kangmei chhuak hian ram acre 73,000 chuanga zau a kang chhe tawh a ni. Sonoma County-a hospital pahnih chu inthiarchhuah tir an ni bawk.

Kumin chhungin California state-ah hian ram kang ṭum 7,700 zet a thleng tawh a, ram acre 780,000 a kangchhe tawh niin CalFire chuan an sawi.