Mexico-ah aftershock 7,000 chuang thleng

September 7-a Mexico rama magnitude 8.2-a naa lir a nghin hnuah khan lirnghing nawn, afterschock ṭum 7,000 chuang a thleng tawh nin Mexico seismological service SSN chuan a sawi.

Mexico rama lir­nghing vang hian mi 98 an thi a, midang tam takin hliam an tuar a ni.

SSN in report a tih­chhuah hnuhnung berah, aftershock hi ṭum 7,036 a thleng tawh a, heng zingah hian September 8 leh September 23 zinga magnitude 6.1-a nate a tel a ni.

SSN leh National Center for Disaster Pre­ven­tion (Cenapred) chuan lirnghing vawi tam tak a thlenna chhan hi Cocos tectonic plate insiamrem vang niin an sawi.

Lirnghing vang hian Mexico chhim lam, Oaxaca leh Chiapis state-a khaw 4,400 ah building 100,000 chuang a chhia a ni. Mi tam tak chu mahni ina cheng zui ngam loin khawlaiahte an riak a ni.