ASEAN Summit-ah Myanmar sipai hotu tel phal lo

Myanmar sipai hotu lu ber, Min Aung Hlaing chu thla leha Association of Southeast Asian Nations (ASEAN)-in regional summit an neih turah a tel an remti lo.

Kumina bloc chair changtu, Cambodia chuan Myanmar tiam lohin ASEAN member ramte hnenah sawmna thawn a nih thu a sawi. Myanmar sipai sorkarin ASEAN peace plan an zawm theih loh avangin summit neih turah hian sawm an ni ve lo tih a sawi a ni.

ASEAN summit vawi 40 leh 41-na te chu thla leh hian Phnom Penh-ah neih a ni ang. Myanmar-a sipai sorkar hian an ram roreltu anga ram dangte pawmna a mamawh hle laiin, summit neih tura sawm a ni leh ta lo hi ram dang nena an indawrna kawngah a nghawng thei dawn a ni.

Min Aung Hlaing leh a kaihhruai sorkar aiawhte chu ASEAN leh a kaihhnawih meeting-ah tel khap an lo ni tawh bawk.

Cambodia-a ministry of foreign affairs and international cooperation thupuangtu, Chum Sunry chuan Myanmar chu politics-a inhnamhnawih lo aiawh rawn tir turin kan hrilh a ni, a ti.

Gen Min Aung Hlaing hi nikum October-a regional summit leh thla hmasaa Washington-a neih zawh tak US-ASEAN Special Summit-ah pawh sawm a ni tawh lo bawk. Sipai sorkara foreign minister Wunna Maung Lwin pawh kumin February leh August thlaa bloc foreign minister meeting-ah a tel phalsak a ni lo bawk a ni.

Meeting-ah hian Myanmar sipai aiawhte tel phal lo mah se, ASEAN chu peace plan a hlawhtling lo chunga an kenkawh luih avangin sawisel an tawk chho hle a ni. Member ramte hi Myanmar chunga hmalak dan turah an ngaihdan a thuhmun thei lo a ni. Cambodia chuan Myanmar sipai sorkar nena inbiakna neih a duh laiin Malaysia chuan khauh zawka khuahkhirh a, Myanmar-a opposition leh civil sorkar, National Unity Government nena inbiakna neih a duh thung.

United Nations General Assembly neih zawh takah khan Malaysia prime minister Ismail Sabri Yaakob chuan ASEAN peace plan hlenchhuah kawngah hmasawnna awm lo lutuk chuan a tihbeidawn thu a sawi.