US-in Ukraine sipaite puihna tur USD mtd 625 hu a pe dawn

United States chuan Russia-in Ukraine laka beihpui a thlak zel karah, Ukraine sipaite puihna turin ralthuam USD mtd 625 hu a thawn leh dawn a, heng zingah hian High Mobility Artillery Rocket System (HIMARS) launcher-te pawh an tel.

US president Joe Biden chuan Thawhlehni khan Ukraine president Volodymyr Zelenskyy biain, US chuan a thlawp zel tur thu a hrilh. Zelenskyy chuan an sipaiten chak taka hma an sawn mek thu leh, Russia sipaiten an laksak tawh khaw tam tak an laklet leh tawh thu a sawi.

Biden chuan Ukraine-in Russia awpbeh tumna dang a, a lo beih let chhung chuan Ukraine chu a thlawp zel dawn tih a sawi. Ukraine sipaite puihna tur a thawn turte hi an chhekkhawlna hmun aṭangin lakchhuah thuai an ni dawn a, an zingah hian HIMARS precision rocket launcher pali, Howitzer 32 leh a mu 75,0000, Mine-Resistant Ambush Protected (MRAP) vehicle 200 leh Claymore anti-personnel mine-te an tel tih White House chuan a tarlang.

US secretary of state Antony Blinken chuan thuchhuah siamin, tun hnaia Russia-in Ukraine ram a luaha lem taka mipui ngaihdan a lak chungchang te, region pali laksak a tuma civil mite chunga rawng taka a chetna chuan an dodalna chu a ti zual sawt dawn a ni, a ti. A hmaa Ukraine sipaite puihna tura ralthuam an lo thawn tawhte chuan Russia sipaite nawr lehna kawngah Ukraine a pui nasa hle a, Kharkiv region pawh an thununna hnuaiah an dah leh theih phah a ni.