NKorea missile kahchhuah hnu lawkah US leh SKorea-in missile kapchhuak ve nghal

North Korea-in Japan ram chunga ballistic missile an kahchhuah tuk lawkah a chhanletna atan South Korea leh United States chuan missile drill ṭhahnem tak an kalpui ve nghal.

Thawhlehnia NKorea-in intermediate-range ballistic missile a kahchhuah chu Japan ram chungah thlawkin, km 4,600-a thui a thlawh hnuah Pacific tuipuiah tla in, NKorea-in missile a enchhin tawh zinga a la kah thui ber ṭum a ni.

NKorea thiltih hi Japan prime minister Fumio Kishida chuan na taka demin, Japan hmarchhak lam biala chengte chu hmun him lama insaseng tura warning pawh pek an ni hman hial a ni. South Korea leh US pawhin an dem thu sawiin, na taka chhanletah an vau zui bawk.

Nimin khan South Korea leh US sipaite chuan surface-to-surface missile pali chu tuipuiah an enchhin zui ve nghal. Ram pahnih sipaite hian Army Tactical Missile System (ATACMS) missile pahnih ve ve kap chhuakin, mock target pawh a fuh niin an sawi.

SKorea leh US sipaite hian fighter jet pariat hmangin bombing drill an nei bawk.