Thailand-in 2018 ah Inthlanpui a buatsaih dawn

Thailand sorkar chuan kum 2018, November thlaah inthlanpui buatsaih a ni dawn tih a puang.

Thailand sipai sorkar hian kum 2014-a thuneih­na a neih hnuah, inthlan neih hun tur hi danpui siamṭhat leh security chhuanlamin a tikhawtlai fo a ni. Prime Minister Prayut Chan-ocha chuan inthlan neih ni tur hi chu nakkun June-ah tihfel a nih tur thu a sawi.

Kum 1932 aṭang khan Thailand-a hian sipai chakna hmangin ṭum 12 zet sorkar paihthlak a ni tawh a, mahse kumin kumtir lam khan sipai sorkar chuan inthlanpui neih a nih hnuah sipai chakna hmanga sorkar paihthlak tum a ni tawn dawn lo tih an tiam a ni.

Hetih lai hian Thailand sorkar chuan nikuma an ram lal thi, King Bhumibol Adulaydej vuina hun chu October 26 hian a buatsaih dawn.

King Bhumibol hi kum sawmsarih zet ro a rel hnuah nikum Ocotber 13 khan a thi a, ram pumah kum khat chhung sun tura tih a ni. King Bhuminol vuina inkhawm hi Grand Palace-ah neih a ni dawn a, inkhawm buatsaih lai hian lal-in hi police officer 78,000 in an veng dawn a ni.