Myanmar sipai court-in kum 10 tang turin Japan filmmaker hrem

Myanmar-a sipai court chuan Japan mi, documentary filmmaker Toru Kubota chu sipai laka helna lantir leh communication law bawh­chhiaah puhin, kum 10 chhung tang turin a hrem.

July thla khan Kubota hi Myanmar-a khawpui lian ber Yangon-ah sipai laka lungawi lohna an lantir lai video leh thla a lo lak avangin Myanmar mi pahnihte man an ni.

Kum 26 mi, Kubota hi Nilaini khan mipui fuihpawrh zawnga a chet avangin kum thum chhung tang tur leh telecommunication law a bawhchhiat avangin kum sarih tang tura hrem a ni tiin Japanese foreign ministry official chuan a sawi.

October 12 hian immigration charge chungchangah a thubuai hi court-ah ngaihtuah a ni leh dawn bawk. "Kubota chhuah a nih theihnan Myanmar thunei­tute kan dil fo tawh a, chhunzawm zel pawh kan tum a ni," tiin ministry official chuan a sawi.

Myanmar sipaiten thuneihna an chan hnua lungawi lohna kalzelah mi 2,336 vel an thi tawh a, mi 12,500 hren mek an ni tih Assistance Association for Political Prisoners chuan a tarlang.

FilmFreeway tarlan danin, Kubota hian a hmaiin Myanmar-a Muslim Rohingya hnam bil tlem zawk leh raltlan bakah chi inthliarna chungchangah documentary a lo siam tawh a ni. Myanmar-a ramdang mi journalist an hren pangana niin, a hma in America mi Nathan Maung leh Danny Fenster, Poland mi Robert Bociaga leh Japan mi Yuki Kitazumi-te chu man an lo ni tawh a, tunah chuan midangte hi chu chhuah zalen ni tawhin an ramah an let leh vek tawh a ni.

Nikum May thlaa Myanmar chhuahsan a tum laia an man, Fenster chu dan bawhchhiatna bakah unlawful association leh visa rules a zawm loh avangin Yangon-a Insein tan-inah khung a ni a, kum 11 tang tura hrem a nih hnuah ngaihdam a ni leh a ni.