Biden-a'n Hurricane Ian vanga chhiatna thlenna hmun tlawh

US president Joe Biden chuan thlipui, hurricane Ian vanga chhiatna nasa tak thlenna Florida state tlawhin, state tana major disaster declaration puan chu ni 60 atan a pawtsei. Hei vang hian kar liam taa thlipui tleh vanga thil chhiate thenfai leh thlipui tuarte enkawlna senso chu sorkar laipuiin a tumsak vek thei dawn a ni.

Nilainia Fort Myers-a tlawh ṭumin, Biden chuan sorkar theihna sang ber hmangin Florida chhawmdawl leh siamṭhat hna kalpui a ni dawn tih a sawi. "He kan intiamna hi kan tihlawhtling ngei dawn a ni tih Florida mipuite'n hria se ka ti a, America chuan a kalsan dawn lo che u a; in kiangah kan awm tlat dawn a ni," tiin Biden chuan a sawi.

President hian thlipui vanga chhiatna thlenna hmunte a tlawh bakah tualchhung mite leh sumdawngte chu Nilainia a zin ṭum hian a hmu a, state official leh politics lama a khingpui Governor Ron DeSantis ten an ṭawiawm a ni. DeSantis chuan sorkar laipuiin a thawhpuina chu fakin, Biden kaihhruai sorkarin disaster declaration an puan avanga a lawmthu sawi bawkin hei hian kawng tamtakah a puih tur thu a sawi.

Florida-ah hian customer 97% hnenah kawlphetha pekchhuah an ni leh tawh a, state chhimthlang lama thlipuiin leitawlh nasa tak a thlenna Lee County-a mi 85% in eng an hmu leh tawh bawk a ni. US chhimthlang lamah thlipui tleh hian chhiatna rapthlak tak thlenin, mi 100 chuangin nunna an chan tawh a ni. Thlipui hian Florida chu a nuai na ber a, Carolina-ah pawh chhiatna lian tham tak a thlen bawk.