Nobel Peace Prize 2022 dawng turin mimal pakhat leh pawl 2 thlang

Nowergian Nobel Committee chair Berit Reiss-Andersen chuan nimin khan Nobel Peace Prize 2022 dawng tur a puang a, mimal pakhat leh pawl pahnih hnenah he chawimawina hi hlan a ni dawn.

Khawvel chawimawina ngaihhlut, Nobel Peace Prize 2022 dawng tura thlante hi Belarus-a human rights advocate Ales Bialiatski, Russian human rights organisation Memorial leh Ukrainian human rights organisation Center for Civil Liberties-te an ni.

Nowergian Nobel Committee chuan Peace Prize dawng tura thlante hi anmahni ram ṭheuhah civil society aiawhtu, kum tam tak mipuite dikna chanvo humhalh tura beitute an ni, a ti. War crime, human rights palzutna leh dik lo taka thuneihna hmang ṭhinte dodalna kawngah theihtawp chhuahin, an vai hian khawtlanga muanna leh mipui rorelna pawimawhzia lantirtute an ni tiin, chawimawina dawng tura thlan an nih chhan a tarlang.

Ales Bialiatski hian kum 1996 khan Viasna (Spring) pawl dinin, muanna leh mipui rorelna a awm theihna atan a thawhhlawk hle. Human rights organisation Memorial hi kum 1987 khan din a ni a, hun kal tawha thilsualtitute zawnchhuah chu hun lo kal tura pawikhawihna venna tih changchawia kal an ni. Centre for Civil Liberties hi Ukraine-a mihringte dikna chanvo leh mipui rorelnain hma a sawn zel theihna atan din niin, Russia-in kumin February thlaa Ukraine a run hnuah war crime thlentua puh Russia mite nihna an haichhuak ṭhin a ni.